ಶ್ರೀ ಜೈವೀರ ಹನುಮಾನ್ ಮಂದಿರದಲ್ಲಿ ಆಷಾಢ ಏಕಾದಶಿ ಸಂಭ್ರಮ; ಭಕ್ತಿಭಾವದಿಂದ ವಿಶೇಷ ಪೂಜೆ

ಕಲಬುರಗಿ, ಜು.25: ನಗರದ ಕರುಣೇಶ್ವರ ನಗರದ ಶ್ರೀ ಜೈವೀರ ಹನುಮಾನ್ ಮಂದಿರದಲ್ಲಿ ಶನಿವಾರ ಆಷಾಢ ಏಕಾದಶಿ ಅಂಗವಾಗಿ ವಿಶೇಷ ಪಾರಾಯಣ, ಪೂಜೆ ಹಾಗೂ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳು ಭಕ್ತಿಭಾವದಿಂದ ಜರುಗಿದವು.

ಕಾರ್ಯಕ್ರಮದಲ್ಲಿ ಶ್ರೀಮದ್ಭಗವದ್ಗೀತೆಯ 15ನೇ ಅಧ್ಯಾಯ, ವಿಷ್ಣು ಸಹಸ್ರನಾಮ, ಶ್ರೀ ವೆಂಕಟೇಶ ಸ್ತೋತ್ರ ಹಾಗೂ ಕೃಷ್ಣಾಷ್ಟಕದ ಸಾಮೂಹಿಕ ಪಾರಾಯಣ ನಡೆಯಿತು. ಪಾಂಡುರಂಗ ಮತ್ತು ರುಕ್ಮಿಣಿ ದೇವಿಯ ಭಾವಚಿತ್ರಗಳಿಗೆ ವಿಶೇಷ ಅಲಂಕಾರ ಮಾಡಿ ಮಹಾಮಂಗಳಾರತಿ ನೆರವೇರಿಸಲಾಯಿತು.

ಈ ಸಂದರ್ಭದಲ್ಲಿ ಪಾರಾಯಣ ಸಂಘದ ಶ್ರೀ ವಿನುತ ಜೋಶಿ ಮಾತನಾಡಿ, ದೇವಶಯನಿ ಏಕಾದಶಿ, ತಪ್ತ ಮುದ್ರಾಧಾರಣೆ, ಚಾತುರ್ಮಾಸ್ಯ ವ್ರತ, ಪಂಡರಪುರ ವಿಠ್ಠಲ ಭಕ್ತಿ ಪರಂಪರೆ ಹಾಗೂ ವೈಷ್ಣವ ಧಾರ್ಮಿಕ ಆಚರಣೆಗಳ ಮಹತ್ವವನ್ನು ವಿವರಿಸಿದರು. ಆಷಾಢ ಶುಕ್ಲ ಏಕಾದಶಿಯಿಂದ ಶ್ರೀಹರಿಯು ಕ್ಷೀರಸಾಗರದಲ್ಲಿ ಆದಿಶೇಷನ ಮೇಲೆ ಯೋಗನಿದ್ರೆಗೆ ಪ್ರವೇಶಿಸುತ್ತಾನೆ ಎಂಬ ಪೌರಾಣಿಕ ಹಿನ್ನೆಲೆಯನ್ನು ವಿವರಿಸಿ, ಇದು ಸಾಮಾನ್ಯ ನಿದ್ರೆಯಲ್ಲದೆ ಲೋಕಕಲ್ಯಾಣಕ್ಕಾಗಿ ಇರುವ ದಿವ್ಯ ಯೋಗಸ್ಥಿತಿ ಎಂದು ತಿಳಿಸಿದರು.

ತಪ್ತ ಮುದ್ರಾಧಾರಣೆ ವೈಷ್ಣವ ಸಂಪ್ರದಾಯದ ಪ್ರಮುಖ ಆಚರಣೆಯಾಗಿದ್ದು, ಶಂಖ, ಚಕ್ರ ಸೇರಿದಂತೆ ಭಗವಂತನ ಆಯುಧಗಳ ಮುದ್ರೆಗಳನ್ನು ಧರಿಸುವುದು ಶರಣಾಗತಿ, ಆಧ್ಯಾತ್ಮಿಕ ಶುದ್ಧತೆ ಹಾಗೂ ಧಾರ್ಮಿಕ ಶಿಸ್ತಿನ ಸಂಕೇತವಾಗಿದೆ ಎಂದು ಹೇಳಿದರು. ಚಾತುರ್ಮಾಸ್ಯ ವ್ರತವು ಇಂದ್ರಿಯನಿಗ್ರಹ, ಆಹಾರ ಸಂಯಮ ಹಾಗೂ ಆತ್ಮಸಾಧನೆಗೆ ಅತ್ಯುತ್ತಮ ಕಾಲವಾಗಿದ್ದು, ಈ ಅವಧಿಯಲ್ಲಿ ನಿಯಮಬದ್ಧ ಜೀವನ ನಡೆಸುವುದರಿಂದ ಆರೋಗ್ಯ ಮತ್ತು ಆಧ್ಯಾತ್ಮಿಕ ಉನ್ನತಿ ಸಾಧ್ಯವಾಗುತ್ತದೆ ಎಂದು ಅಭಿಪ್ರಾಯಪಟ್ಟರು.

ಪಂಡರಪುರದ ವಿಠ್ಠಲ ಭಕ್ತಿ ಪರಂಪರೆ, ಪುಂಡಲೀಕನ ಮಾತೃ-ಪಿತೃ ಭಕ್ತಿ, ವಾರಕರಿ ಸಂಪ್ರದಾಯ ಹಾಗೂ ಕರ್ನಾಟಕದ ಹರಿದಾಸರ ಭಕ್ತಿ ಪರಂಪರೆಯ ಕುರಿತು ಮಾತನಾಡಿದ ಅವರು, ನಾಮಸ್ಮರಣೆ, ಸೇವಾಭಾವ ಮತ್ತು ವಿನಯವೇ ಭಗವಂತನನ್ನು ಒಲಿಸಿಕೊಳ್ಳುವ ನಿಜವಾದ ಮಾರ್ಗ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ದೇವಸ್ಥಾನ ಸಮಿತಿ ಅಧ್ಯಕ್ಷ ಅವಿನಾಶ ಕುಲಕರ್ಣಿ, ಡಾ. ಶ್ರೀನಿವಾಸ್ ಜಹಾಗೀರದಾರ್, ಶಂಕರರಾವ್ ಸಿಂದಗಿಕರ್, ಕಿಶನರಾವ್ ಕುಲಕರ್ಣಿ, ಸಮೀರ್ ಕುಲಕರ್ಣಿ, ಸುನೀಲ್ ಕುಲಕರ್ಣಿ, ದೇವಸ್ಥಾನದ ಅರ್ಚಕರಾದ ಪ್ರದ್ಯುಮ್ನಾಚಾರ್ಯ ಜೋಶಿ ಹಾಗೂ ವೆಂಕಟೇಶಾಚಾರ್ಯ ನೆಲೋಗಿ ಸೇರಿದಂತೆ ಅನೇಕ ಭಕ್ತರು ಭಾಗವಹಿಸಿ ಆಷಾಢ ಏಕಾದಶಿಯನ್ನು ಶ್ರದ್ಧಾಭಕ್ತಿಯಿಂದ ಆಚರಿಸಿದರು.