ಬಾದ್ಶಾ–ಈಶಾ ರಿಖಿ ವಿಚ್ಛೇದನ ವದಂತಿ ವೈರಲ್; ಮದುವೆಯ ಅಪರೂಪದ ಫೋಟೋಗಳೇ ಚರ್ಚೆಗೆ ಕಾರಣ
ಇನ್ಸ್ಟಾಗ್ರಾಂ ಪೋಸ್ಟ್ ಬಳಿಕ ಊಹಾಪೋಹಗಳಿಗೆ ತೆರೆ; ದಂಪತಿಯಿಂದ ಇನ್ನೂ ಯಾವುದೇ ಅಧಿಕೃತ ಪ್ರತಿಕ್ರಿಯೆ ಇಲ್ಲ
ಜನಪ್ರಿಯ ರ್ಯಾಪರ್ ಹಾಗೂ ಗಾಯಕ ಬಾದ್ಶಾ ಮತ್ತು ಪಂಜಾಬಿ ನಟಿ ಈಶಾ ರಿಖಿ ವಿಚ್ಛೇದನ ಪಡೆಯಲಿದ್ದಾರೆ ಎಂಬ ವದಂತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಆದರೆ ಈ ಕುರಿತು ದಂಪತಿ ಅಥವಾ ಅವರ ಪ್ರತಿನಿಧಿಗಳಿಂದ ಯಾವುದೇ ಅಧಿಕೃತ ಮಾಹಿತಿ ಪ್ರಕಟವಾಗಿಲ್ಲ.
ಈ ಚರ್ಚೆಗೆ ಕಾರಣವಾಗಿದ್ದು ಈಶಾ ರಿಖಿ ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡ ಮದುವೆಯ ಅಪರೂಪದ ಫೋಟೋಗಳು ಮತ್ತು ವಿಡಿಯೊಗಳು. ಪೋಸ್ಟ್ನಲ್ಲಿ ಬಾದ್ಶಾ ಮತ್ತು ಈಶಾ ಪರಸ್ಪರ ಹಾರ ವಿನಿಮಯ ಮಾಡಿಕೊಳ್ಳುತ್ತಿರುವ ದೃಶ್ಯಗಳ ಜೊತೆಗೆ, ಬಾದ್ಶಾ ಈಶಾ ಅವರ ಕೆನ್ನೆಗೆ ಮುತ್ತಿಡುತ್ತಿರುವ ವಿಡಿಯೊವೂ ಸೇರಿತ್ತು.
ಈ ನೆನಪುಗಳನ್ನು ಹಂಚಿಕೊಂಡ ಈಶಾ, “ಪ್ರತಿ ಬಿರುಗಾಳಿಯೂ ಒಂದು ಪಾಠ… ಪ್ರತಿ ಪ್ರಾರ್ಥನೆಯೂ ಒಂದು ಆಶಾಕಿರಣ” ಎಂದು ಬರೆದುಕೊಂಡಿದ್ದರು. ಈ ಸಾಲುಗಳನ್ನು ನೋಡಿ ಹಲವು ನೆಟ್ಟಿಗರು ದಂಪತಿಯ ನಡುವೆ ಬಿರುಕು ಮೂಡಿರಬಹುದು ಎಂದು ಊಹಿಸಲು ಆರಂಭಿಸಿದರು.
ಆದರೆ ಇನ್ನೂ ಕೆಲವರು ಇದು ಕೇವಲ ಮದುವೆಯ ನೆನಪುಗಳನ್ನು ಹಂಚಿಕೊಳ್ಳುವ ಸಾಮಾನ್ಯ ಪೋಸ್ಟ್ ಆಗಿರಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ವಿಚ್ಛೇದನದ ಕುರಿತು ಹರಿದಾಡುತ್ತಿರುವ ಸುದ್ದಿಗಳಿಗೆ ಬಾದ್ಶಾ ಅಥವಾ ಈಶಾ ರಿಖಿ ಯಾರೂ ಪ್ರತಿಕ್ರಿಯಿಸಿಲ್ಲ.
ಬಾದ್ಶಾ ಮತ್ತು ಈಶಾ ರಿಖಿ ಮದುವೆಯಾದ ಸುದ್ದಿ ಮೊದಲ ಬಾರಿಗೆ 2026ರ ಮಾರ್ಚ್ನಲ್ಲಿ ಹೊರಬಂದಿತ್ತು. ಆಪ್ತರ ಸಮ್ಮುಖದಲ್ಲಿ ನಡೆದ ಸಿಖ್ ಸಂಪ್ರದಾಯದ ಮದುವೆಯ ಚಿತ್ರಗಳನ್ನು ಮೊದಲಿಗೆ ಈಶಾ ಅವರ ತಾಯಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದರು.
ಬಾದ್ಶಾ ಈ ಹಿಂದೆ ಜಾಸ್ಮಿನ್ ಮಸೀಹ್ ಅವರನ್ನು ವಿವಾಹವಾಗಿದ್ದು, ಅವರಿಗೆ ಒಬ್ಬ ಪುತ್ರಿಯಿದ್ದಾರೆ. ವಿಚ್ಛೇದನದ ಬಳಿಕ ತಮ್ಮ ವೈಯಕ್ತಿಕ ಜೀವನವನ್ನು ಸಾರ್ವಜನಿಕ ವಲಯದಿಂದ ದೂರವಿಟ್ಟಿದ್ದ ಅವರು, ಈಶಾ ರಿಖಿಯೊಂದಿಗಿನ ಸಂಬಂಧವನ್ನು ಕೂಡ ಬಹಳ ಗೌಪ್ಯವಾಗಿಯೇ ಇಟ್ಟುಕೊಂಡಿದ್ದರು.
ಸದ್ಯ ವಿಚ್ಛೇದನದ ಬಗ್ಗೆ ಹರಿದಾಡುತ್ತಿರುವ ಸುದ್ದಿಗಳು ಕೇವಲ ಊಹಾಪೋಹಗಳಾಗಿದ್ದು, ಅಧಿಕೃತ ದೃಢೀಕರಣ ಹೊರಬರುವವರೆಗೆ ಅವುಗಳನ್ನು ವದಂತಿಗಳಾಗಿಯೇ ಪರಿಗಣಿಸಬೇಕು.
