ಗಗನದಲ್ಲೇ ವಿಮಾನದ ಕಿಟಕಿ ಕಳಚಿ ಆತಂಕ: ಪ್ರಯಾಣಿಕನ ದೇಹ ಭಾಗಶಃ ಹೊರಗೆ ಎಳೆದ ಘಟನೆ

ಜರ್ಮನಿಯ ಮೆಮ್ಮಿಂಗನ್‌ಗೆ ತೆರಳುತ್ತಿದ್ದ ರಯಾನೇರ್ (Ryanair) ವಿಮಾನದಲ್ಲಿ ಗಗನದಲ್ಲೇ ಕಿಟಕಿ ಕಳಚಿ ಬಿದ್ದ ಪರಿಣಾಮ ಪ್ರಯಾಣಿಕರಲ್ಲಿ ಭಾರೀ ಆತಂಕ ಉಂಟಾದ ಘಟನೆ ಗ್ರೀಸ್‌ನಲ್ಲಿ ನಡೆದಿದೆ. ಘಟನೆಯ ಬಳಿಕ ವಿಮಾನವನ್ನು ತುರ್ತುವಾಗಿ ಥೆಸ್ಸಲೋನಿಕಿಗೆ ಮರಳಿ ಸುರಕ್ಷಿತವಾಗಿ ಇಳಿಸಲಾಯಿತು.

ವರದಿಗಳ ಪ್ರಕಾರ, ವಿಮಾನ ಟೇಕ್‌ಆಫ್ ಆದ ಕೆಲವೇ ಹೊತ್ತಿನಲ್ಲಿ ಕಿಟಕಿ ಕಳಚಿ ಬಿದ್ದ ಪರಿಣಾಮ ಕ್ಯಾಬಿನ್‌ನೊಳಗಿನ ಗಾಳಿಯ ಒತ್ತಡ ಏಕಾಏಕಿ ಕಡಿಮೆಯಾಯಿತು. ಕಿಟಕಿಯ ಪಕ್ಕದಲ್ಲಿದ್ದ ಒಬ್ಬ ಪ್ರಯಾಣಿಕನ ತಲೆ ಮತ್ತು ಭುಜದ ಭಾಗ ವಿಮಾನದ ಹೊರಭಾಗಕ್ಕೆ ಎಳೆಯಲ್ಪಟ್ಟಿತು. ಆದರೆ ಅವರು ಸೀಟ್ ಬೆಲ್ಟ್ ಧರಿಸಿದ್ದರಿಂದ ದೊಡ್ಡ ಅನಾಹುತ ತಪ್ಪಿದ್ದು, ಸಮೀಪದಲ್ಲಿದ್ದ ಇತರ ಪ್ರಯಾಣಿಕರು ಅವರನ್ನು ಒಳಕ್ಕೆ ಎಳೆದು ರಕ್ಷಿಸಿದರು.

ಘಟನೆಯ ವೇಳೆ ಭಾರೀ ಸದ್ದಿನೊಂದಿಗೆ ಆಮ್ಲಜನಕ ಮಾಸ್ಕ್‌ಗಳು ಸ್ವಯಂಚಾಲಿತವಾಗಿ ಕೆಳಗೆ ಬಿದ್ದವು. ಕ್ಯಾಬಿನ್‌ನಲ್ಲಿ ಆತಂಕದ ವಾತಾವರಣ ನಿರ್ಮಾಣವಾಗಿದ್ದು, ಪ್ರಯಾಣಿಕರು ಕಿರುಚಾಟ ಆರಂಭಿಸಿದರು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಗಾಯಗೊಂಡ ಪ್ರಯಾಣಿಕನನ್ನು ಸರ್ಬಿಯಾದ ಪ್ರವಾಸಿಗ ಎಂದು ಗುರುತಿಸಲಾಗಿದ್ದು, ದೇಹದ ಮೇಲೆ ಗಾಯಗಳಾಗಿರುವ ಕಾರಣ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅವರ ಆರೋಗ್ಯ ಸ್ಥಿರವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

ಪ್ರಾಥಮಿಕ ಮಾಹಿತಿಯ ಪ್ರಕಾರ, ವಿಮಾನದ ಎಂಜಿನ್‌ನಿಂದ ಬೇರ್ಪಟ್ಟಿರಬಹುದಾದ ಅವಶೇಷ ಕಿಟಕಿಗೆ ಬಡಿದು ಅದು ಒಡೆದಿರಬಹುದು ಎಂಬ ಶಂಕೆ ವ್ಯಕ್ತವಾಗಿದೆ. ಆದರೆ ನಿಖರ ಕಾರಣ ಇನ್ನೂ ದೃಢಪಟ್ಟಿಲ್ಲ.

ಬೋಯಿಂಗ್ 737 ಎನ್‌ಜಿ ಮಾದರಿಯ ಈ ವಿಮಾನದ ಘಟನೆ ಕುರಿತು ಗ್ರೀಸ್ ನಾಗರಿಕ ವಿಮಾನಯಾನ ಪ್ರಾಧಿಕಾರ ತನಿಖೆ ಆರಂಭಿಸಿದ್ದು, ಅಮೆರಿಕದ ಫೆಡರಲ್ ಏವಿಯೇಷನ್ ಆಡಳಿತ (FAA) ಹಾಗೂ ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿ (NTSB) ಅಗತ್ಯ ಸಹಕಾರ ನೀಡಲು ಸಿದ್ಧವಿರುವುದಾಗಿ ತಿಳಿಸಿವೆ.

ಘಟನೆಯ ಬಳಿಕ ಎಲ್ಲ ಪ್ರಯಾಣಿಕರನ್ನು ಸುರಕ್ಷಿತವಾಗಿ ವಿಮಾನ ನಿಲ್ದಾಣಕ್ಕೆ ಕರೆತರಲಾಗಿದ್ದು, ಅವರನ್ನು ಗಮ್ಯಸ್ಥಾನಕ್ಕೆ ಕರೆದೊಯ್ಯಲು ರಯಾನೇರ್ ಪರ್ಯಾಯ ವಿಮಾನದ ವ್ಯವಸ್ಥೆ ಮಾಡಿದೆ.