ಭಾರತ ಕ್ರಿಕೆಟ್‌ಗೆ ಹೊಸ ಇತಿಹಾಸ: ಅತಿ ಕಿರಿಯ ವಯಸ್ಸಿನಲ್ಲಿ ಪದಾರ್ಪಣೆ ಮಾಡಿದ ವೈಭವ್ ಸೂರ್ಯವಂಶಿ

ಭಾರತೀಯ ಕ್ರಿಕೆಟ್‌ಗೆ ಹೊಸ ತಾರೆ ಉದಯವಾಗಿದ್ದು, ಕೇವಲ ೧೫ ವರ್ಷ ೯೧ ದಿನಗಳ ವಯಸ್ಸಿನಲ್ಲಿ ವೈಭವ್ ಸೂರ್ಯವಂಶಿ ಭಾರತ ತಂಡದ ಪರ ಹಿರಿಯರ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿ ಹೊಸ ಇತಿಹಾಸ ನಿರ್ಮಿಸಿದ್ದಾರೆ. ಇದರೊಂದಿಗೆ ಭಾರತ ಪರ ಅತಿ ಕಿರಿಯ ವಯಸ್ಸಿನಲ್ಲಿ ಹಿರಿಯರ ಅಂತರರಾಷ್ಟ್ರೀಯ ಪಂದ್ಯ ಆಡಿದ ಆಟಗಾರ ಎಂಬ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ.

ಇದುವರೆಗೆ ಈ ದಾಖಲೆ ಭಾರತ ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಹೆಸರಿನಲ್ಲಿತ್ತು. ಅವರು ೧೬ ವರ್ಷ ೨೦೫ ದಿನಗಳ ವಯಸ್ಸಿನಲ್ಲಿ ಭಾರತ ತಂಡದ ಪರ ಮೊದಲ ಪಂದ್ಯ ಆಡಿದ್ದರು. ಇದೀಗ ವೈಭವ್ ಸೂರ್ಯವಂಶಿ ಆ ದಾಖಲೆಯನ್ನು ಮುರಿದು ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ.

ಪುರುಷ ಹಾಗೂ ಮಹಿಳಾ ವಿಭಾಗಗಳನ್ನು ಸೇರಿಸಿ ನೋಡಿದರೂ, ಭಾರತ ಪರ ಹಿರಿಯರ ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಪದಾರ್ಪಣೆ ಮಾಡಿದ ಅತಿ ಕಿರಿಯ ಆಟಗಾರ ಎಂಬ ಗೌರವವೂ ವೈಭವ್ ಸೂರ್ಯವಂಶಿಗೆ ಸಲ್ಲುತ್ತದೆ. ಈ ಹಿಂದೆ ಮಹಿಳಾ ವಿಭಾಗದಲ್ಲಿ ಶಫಾಲಿ ವರ್ಮಾ ೧೫ ವರ್ಷ ೨೩೯ ದಿನಗಳ ವಯಸ್ಸಿನಲ್ಲಿ ಭಾರತ ತಂಡಕ್ಕೆ ಪದಾರ್ಪಣೆ ಮಾಡಿ ಈ ಸಾಧನೆ ಮಾಡಿದ್ದರು.

ಭಾರತದ ಪರ ಅತಿ ಕಿರಿಯ ವಯಸ್ಸಿನಲ್ಲಿ ಪದಾರ್ಪಣೆ ಮಾಡಿದ ಪುರುಷ ಆಟಗಾರರ ಪಟ್ಟಿ:

• ವೈಭವ್ ಸೂರ್ಯವಂಶಿ – ೧೫ ವರ್ಷ ೯೧ ದಿನ (ಐರ್ಲೆಂಡ್ ವಿರುದ್ಧ)
• ಸಚಿನ್ ತೆಂಡೂಲ್ಕರ್ – ೧೬ ವರ್ಷ ೨೦೫ ದಿನ (ಪಾಕಿಸ್ತಾನ ವಿರುದ್ಧ)
• ಪಿಯೂಷ್ ಚಾವ್ಲಾ – ೧೭ ವರ್ಷ ೭೫ ದಿನ (ಇಂಗ್ಲೆಂಡ್ ವಿರುದ್ಧ)
• ಲಕ್ಷ್ಮಣ್ ಶಿವರಾಮಕೃಷ್ಣನ್ – ೧೭ ವರ್ಷ ೧೧೮ ದಿನ (ವೆಸ್ಟ್ ಇಂಡೀಸ್ ವಿರುದ್ಧ)
• ಪಾರ್ಥಿವ್ ಪಟೇಲ್ – ೧೭ ವರ್ಷ ೧೫೨ ದಿನ (ಇಂಗ್ಲೆಂಡ್ ವಿರುದ್ಧ)
• ಮನೀಂದರ್ ಸಿಂಗ್ – ೧೭ ವರ್ಷ ೧೯೩ ದಿನ (ಪಾಕಿಸ್ತಾನ ವಿರುದ್ಧ)

ಕಿರಿಯ ವಯಸ್ಸಿನಲ್ಲೇ ದೇಶದ ಪರ ಆಡಲು ಅವಕಾಶ ಪಡೆದಿರುವ ವೈಭವ್ ಸೂರ್ಯವಂಶಿ ಅವರ ಮೇಲೆ ಈಗ ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ನಿರೀಕ್ಷೆಗಳು ಹೆಚ್ಚಿದ್ದು, ಮುಂದಿನ ದಿನಗಳಲ್ಲಿ ಅವರು ತಂಡದ ಪ್ರಮುಖ ಆಟಗಾರರಾಗಿ ಬೆಳೆಯುವ ವಿಶ್ವಾಸ ವ್ಯಕ್ತವಾಗುತ್ತಿದೆ.