ಸಿಂಗಾಪುರ ಪ್ರಜೆಯ ಕಳೆದುಹೋದ ಪಾಸ್‌ಪೋರ್ಟ್ ಪತ್ತೆಹಚ್ಚಿ ಹಸ್ತಾಂತರಿಸಿದ ಪೊಲೀಸರು

ಕಲಬುರಗಿ, ಆ. 3: ಆಪರೇಷನ್ ಸ್ಮೈಲ್ ಯೋಜನೆಯಡಿ ಚಿಕಿತ್ಸೆ ಪಡೆಯಲು ಸಿಂಗಾಪುರದಿಂದ ಕಲಬುರಗಿಯ ಜಿಮ್ಸ್ ಆಸ್ಪತ್ರೆಗೆ ಆಗಮಿಸಿದ್ದ ವಿದೇಶಿ ಪ್ರಜೆಯೊಬ್ಬರು ತಮ್ಮ ಪಾಸ್‌ಪೋರ್ಟ್ ಹಾಗೂ ಪರ್ಸ್ ಕಳೆದುಕೊಂಡು ಆತಂಕಕ್ಕೊಳಗಾಗಿದ್ದರು.

ಈ ವಿಷಯ ತಿಳಿಯುತ್ತಿದ್ದಂತೆ ಪೊಲೀಸರು ತಕ್ಷಣ ಕಾರ್ಯಪ್ರವೃತ್ತರಾಗಿ ಪಾಸ್‌ಪೋರ್ಟ್ ಹಾಗೂ ಪರ್ಸ್‌ಗಾಗಿ ಹುಡುಕಾಟ ನಡೆಸಿ, ಅವುಗಳನ್ನು ಸುರಕ್ಷಿತವಾಗಿ ಪತ್ತೆಹಚ್ಚಿದರು. ಬಳಿಕ ಕಳೆದುಹೋಗಿದ್ದ ದಾಖಲೆಗಳು ಹಾಗೂ ಪರ್ಸ್ ಅನ್ನು ಸಂಬಂಧಿತ ಸಿಂಗಾಪುರ ಪ್ರಜೆಗೆ ಹಸ್ತಾಂತರಿಸಿದರು.

ಪೊಲೀಸರ ಸಮಯೋಚಿತ ಕಾರ್ಯದಿಂದ ವಿದೇಶಿ ಪ್ರಜೆಯ ಆತಂಕ ದೂರವಾಗಿದ್ದು, ಅವರು ಪೊಲೀಸ್ ಇಲಾಖೆಗೆ ಕೃತಜ್ಞತೆ ಸಲ್ಲಿಸಿದರು.

ಪೊಲೀಸ್ ಇಲಾಖೆಯ ಈ ತ್ವರಿತ ಹಾಗೂ ಮಾನವೀಯ ಸೇವೆಗೆ ಸಾರ್ವಜನಿಕ ವಲಯದಲ್ಲಿಯೂ ಮೆಚ್ಚುಗೆ ವ್ಯಕ್ತವಾಗಿದ್ದು, ಸಂಕಷ್ಟದಲ್ಲಿರುವವರಿಗೆ ನೆರವಾಗುವ ಪೊಲೀಸ್ ಸಿಬ್ಬಂದಿಯ ಸೇವಾ ಮನೋಭಾವಕ್ಕೆ ಪ್ರಶಂಸೆ ವ್ಯಕ್ತವಾಗಿದೆ.