ಸಂಗೀತ ಮಾನವನ ಬದುಕಿಗೆ ದೇವರು ನೀಡಿದ ಅಮೂಲ್ಯ ವರ: ಅರ್ಜುನ ಜಮಾದಾರ

ಕಲಬುರಗಿ: ಸಂಗೀತವು ಮಾನವನ ಬದುಕಿಗೆ ದೇವರು ನೀಡಿದ ಅಮೂಲ್ಯ ವರವಾಗಿದ್ದು, ಅದು ಕೇವಲ ಮನರಂಜನೆಯ ಸಾಧನವಲ್ಲ; ಮನಸ್ಸಿಗೆ ನೆಮ್ಮದಿ, ಆತ್ಮಕ್ಕೆ ಆನಂದ ಹಾಗೂ ಜೀವನಕ್ಕೆ ಹೊಸ ಚೈತನ್ಯ ನೀಡುವ ದಿವ್ಯ ಕಲೆಯಾಗಿದೆ ಎಂದು ಕಲಬುರಗಿಯ ಮಾತಾ ಮಾಣಿಕೇಶ್ವರಿ ದೇವಸ್ಥಾನದ ಕಾರ್ಯದರ್ಶಿ ಅರ್ಜುನ ಜಮಾದಾರ ಹೇಳಿದರು.

ನಗರದ ಮಾಣಿಕೇಶ್ವರಿ ಕಾಲೋನಿಯ ಕೋಕಿಲಾ ಪರಮೇಶ್ವರಿ ದೇವಸ್ಥಾನದ ಆವರಣದಲ್ಲಿ ಗಾನ ಭಾರತಿ ಸಂಗೀತ ಸಾಹಿತ್ಯ ಸೇವಾ ಸಂಸ್ಥೆ (ರಿ.), ಚೌಡಾಪುರ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಬೆಂಗಳೂರು ಸಹಯೋಗದಲ್ಲಿ ಆಯೋಜಿಸಿದ್ದ ‘ಕಲಬುರಗಿ ಉತ್ಸವ’ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಭಾರತೀಯ ಸಂಗೀತವು ನಮ್ಮ ಸಂಸ್ಕೃತಿಯ ಜೀವಾಳವಾಗಿದ್ದು, ಪರಂಪರೆಯನ್ನು ಮುಂದಿನ ಪೀಳಿಗೆಗೆ ತಲುಪಿಸುವ ಅಮೂಲ್ಯ ಸೇತುವೆಯಾಗಿದೆ. ಸಂಗೀತವು ನೋವನ್ನು ಮರೆಯಿಸಿ, ಸಂತೋಷವನ್ನು ಹೆಚ್ಚಿಸಿ, ಬದುಕಿಗೆ ಹೊಸ ಭರವಸೆ ನೀಡುವ ಶಕ್ತಿಯನ್ನು ಹೊಂದಿದೆ. ಆದ್ದರಿಂದ ಸಂಗೀತವು ಕೇವಲ ಕಲೆಯಲ್ಲ, ಅದು ನಮ್ಮ ಸಂಸ್ಕೃತಿ ಮತ್ತು ಜೀವನ ಮೌಲ್ಯಗಳನ್ನು ಶ್ರೀಮಂತಗೊಳಿಸುವ ಮಾಧ್ಯಮವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಸರ್ವೋದಯ ಶಿಕ್ಷಣ ಸಂಸ್ಥೆ, ಕಲಬುರಗಿಯ ಅಧ್ಯಕ್ಷ ಮಲ್ಲಿಕಾರ್ಜುನ ಜೋಕೆ ವಹಿಸಿದ್ದರು. ಮುಖ್ಯ ಅತಿಥಿಗಳಾಗಿ ರಾಜೇಂದ್ರ ಝಳಕಿ, ಸಾಯಬಣ್ಣ ವಡಗೇರಿ, ನಟರಾಜ ಕಟ್ಟಿಮನಿ, ಜಗನ್ನಾಥ ಹೀರೊಳ್ಳಿ, ಟಿ.ವಿ. ಅಂಬಿಗರ, ಗುರುನಾಥ ಚಿಂಚನಸೂರ, ಅಂಬರಾಯ ಕೋಣೆ, ಶ್ರೀಮತಿ ಪುಷ್ಪಾ ಹಾಗೂ ಗಾನ ಭಾರತಿ ಸಂಗೀತ ಸಾಹಿತ್ಯ ಸೇವಾ ಸಂಸ್ಥೆಯ ಅಧ್ಯಕ್ಷೆ ಶ್ರೀಮತಿ ಮಹಾದೇವಿ ಎಸ್. ಸಪ್ಪನಗೋಳ ಉಪಸ್ಥಿತರಿದ್ದರು.

ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಆಕಾಶವಾಣಿ ಕಲಾವಿದರಾದ ಅಣ್ಣಾರಾವ ಮುತ್ತಿಮಡು, ಶಿವಶರಣಯ್ಯ ಲಿಂಗದಳ್ಳಿ, ಬಾಬುರಾವ ಕೋಬಾಳ್, ಬಸಯ್ಯ ಬಿ. ಗುತ್ತೇದಾರ, ಉದಯಕುಮಾರ್ ಶಾಸ್ತ್ರಿಗಳು, ತೋಟಯ್ಯ ಶಾಸ್ತ್ರಿಗಳು, ತೇಜು ಎಸ್. ನಾಗೋಜಿ, ಶಿವರಾಜ ಪಾಟೀಲ್, ಶರಣು ಕುಂಬಾರ್, ಶಿವಾನಂದ ತಾವರಖೇಡ, ಶ್ರೀಮತಿ ವಿಜಯಲಕ್ಷ್ಮಿ ಎಸ್. ಕೆಂಗನಾಳ, ಶ್ರೀಮತಿ ನಿರ್ಮಲಾ ಎ. ಕೋಣೆ ಸೇರಿದಂತೆ ಹಲವಾರು ಕಲಾವಿದರು ಸಂಗೀತ ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟು ಪ್ರೇಕ್ಷಕರ ಮನಗೆದ್ದರು.

ಕಾರ್ಯಕ್ರಮದಲ್ಲಿ ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ ಕಲಾವಿದರ ಗಾಯನವನ್ನು ಆಸ್ವಾದಿಸಿ, ಸಾಂಸ್ಕೃತಿಕ ಉತ್ಸವವನ್ನು ಯಶಸ್ವಿಗೊಳಿಸಿದರು.