ಕಲಬುರಗಿಯ ಎಸ್.ಕೆ. ಕಾಂತಾ ಸೇರಿ ನಾಲ್ವರಿಗೆ ಬಸವ ಮೀಡಿಯಾ ಪ್ರಶಸ್ತಿ

ಗದಗ, ಅ. ೨೨: ಬಸವಾದಿ ಶರಣರ ತತ್ವಗಳು ಮತ್ತು ವಚನಗಳು ಒಂದು ಪ್ರಾಂತ, ಭಾಷೆ ಅಥವಾ ಜನಾಂಗಕ್ಕೆ ಸೀಮಿತವಾಗದೆ ಜಾಗತಿಕ ಮಟ್ಟದಲ್ಲಿ ತಲುಪಬೇಕು ಎಂಬ ಉದ್ದೇಶದಿಂದ ಡಿಜಿಟಲ್ ವಿಡಿಯೊ, ಅನಿಮೇಷನ್, ಧ್ವನಿಮುದ್ರಣ, ಕಲೆ, ಸಂಗೀತ ಮತ್ತು ಮುದ್ರಣ ಸೇರಿದಂತೆ ವಿವಿಧ ಮಾಧ್ಯಮಗಳ ಮೂಲಕ ಬಸವ ತತ್ವಗಳ ಪ್ರಸಾರಕ್ಕೆ ಶ್ರಮಿಸಲಾಗುತ್ತಿದೆ. ಭಾರತೀಯ ಸಂವಿಧಾನದ ಆಶಯಗಳನ್ನು ಸಾಕಾರಗೊಳಿಸುವುದು, ಹಿಂದುಳಿದ ಹಾಗೂ ಶೋಷಿತ ಸಮುದಾಯಗಳ ಉನ್ನತಿ, ಬಹುತ್ವ, ಸಮಾನತೆ ಮತ್ತು ಸೌಹಾರ್ದಯುತ ಸಮಾಜ ನಿರ್ಮಾಣದ ನಿಟ್ಟಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಗಣ್ಯರನ್ನು ಗುರುತಿಸಿ, ಮಾಜಿ ಸಚಿವ ಎಸ್.ಕೆ. ಕಾಂತಾ ಸೇರಿದಂತೆ ನಾಲ್ವರಿಗೆ ಗದಗದ ಬಸವ ಮೀಡಿಯಾ ಪ್ರಶಸ್ತಿ ಘೋಷಿಸಲಾಗಿದೆ.

ಎಸ್.ಕೆ. ಕಾಂತಾ ಅವರಿಗೆ ಗೌರವ

ಕಲಬುರಗಿಯ ಎಂ.ಎಸ್.ಕೆ. ಮಿಲ್‌ನಲ್ಲಿ ಕಾರ್ಮಿಕರಾಗಿ ದುಡಿದು, ಹಲವು ಕಾರ್ಮಿಕ ಸಂಘಟನೆಗಳ ಸಂಘಟಕರಾಗಿ ಹಾಗೂ ಕಾರ್ಮಿಕ ಹೋರಾಟಗಳ ನಾಯಕರಾಗಿ ಗುರುತಿಸಿಕೊಂಡಿದ್ದ ಎಸ್.ಕೆ. ಕಾಂತಾ ಅವರು ಎರಡು ಬಾರಿ ಶಾಸಕರಾಗಿ ಆಯ್ಕೆಯಾಗಿದ್ದರು. ೧೯೮೩ರಲ್ಲಿ ಕರ್ನಾಟಕ ಸರ್ಕಾರದಲ್ಲಿ ಕಾರ್ಮಿಕ ಸಚಿವರಾಗಿಯೂ ಸೇವೆ ಸಲ್ಲಿಸಿದ್ದರು. ಸರಳತೆ, ಪ್ರಾಮಾಣಿಕತೆ ಮತ್ತು ನಿಷ್ಠೆಯಿಂದ ಸಾರ್ವಜನಿಕ ಸೇವೆ ಸಲ್ಲಿಸಿದ ಅವರು, ಉನ್ನತ ಅಧಿಕಾರದ ಸ್ಥಾನಗಳನ್ನು ಅಲಂಕರಿಸಿದರೂ ಸರಳ ಜೀವನ ನಡೆಸಿದ ಅಪರೂಪದ ವ್ಯಕ್ತಿಯಾಗಿದ್ದಾರೆ.

ಡಾ. ಆನಂದ ಪಾಂಡುರಂಗಿಗೆ ಮರಣೋತ್ತರ ಪ್ರಶಸ್ತಿ

ಕರ್ನಾಟಕದ ಖ್ಯಾತ ಮನೋವೈದ್ಯ ಡಾ. ಆನಂದ ಪಾಂಡುರಂಗಿ ಅವರು ದಾರಿ ತಪ್ಪುತ್ತಿರುವ ಮಕ್ಕಳು, ಸಂಕಷ್ಟದಲ್ಲಿರುವ ಯುವಕರು, ವಿಚ್ಛೇದನದ ಅಂಚಿನಲ್ಲಿರುವ ನವದಂಪತಿಗಳು, ವೃದ್ಧಾಪ್ಯದಿಂದ ಬಳಲುತ್ತಿರುವ ಹಿರಿಯರು ಹಾಗೂ ವೃತ್ತಿಜೀವನದ ಒತ್ತಡ ಎದುರಿಸುತ್ತಿರುವವರಿಗೆ ಮಾರ್ಗದರ್ಶನ ಮತ್ತು ಸೂಕ್ತ ಚಿಕಿತ್ಸೆ ನೀಡುವ ಮೂಲಕ ಅನೇಕ ಜನರ ಬದುಕಿನಲ್ಲಿ ಬೆಳಕು ಮೂಡಿಸಿದ್ದಾರೆ. ಬಡವರು ಸೇರಿದಂತೆ ವಿವಿಧ ವರ್ಗಗಳ ಜನರ ಬಗ್ಗೆ ವಿಶೇಷ ಕಾಳಜಿ ವಹಿಸಿ, ಅಸಂಖ್ಯಾತ ಜನರ ಜೀವ ಮತ್ತು ಕುಟುಂಬಗಳ ನೆಮ್ಮದಿಯನ್ನು ಕಾಪಾಡಲು ಶ್ರಮಿಸಿದ್ದರು.

ಶ್ರೀ ತೋಂಟದಾರ್ಯ ಮಠದೊಂದಿಗೆ ಅವರು ಅವಿನಾಭಾವ ಸಂಬಂಧ ಹೊಂದಿದ್ದರು. ಅವರ ಸೇವೆಯನ್ನು ಸ್ಮರಿಸಿ ಮರಣೋತ್ತರವಾಗಿ ಈ ಪ್ರಶಸ್ತಿಯನ್ನು ನೀಡಲಾಗಿದೆ.

ಐ.ಆರ್. ಮಠಪತಿಗೆ ಪ್ರಶಸ್ತಿ

ಬೆಳಗಾವಿ ಜಿಲ್ಲೆಯ ಹಾರೂಗೇರಿಯ ಶರಣ ವಿಚಾರವಾಹಿನಿಯ ಅಧ್ಯಕ್ಷ ಐ.ಆರ್. ಮಠಪತಿ ಅವರು ವೃತ್ತಿಯಿಂದ ಪ್ರೌಢಶಾಲಾ ಶಿಕ್ಷಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ವೃತ್ತಿಯ ಜೊತೆಗೆ ಪ್ರವೃತ್ತಿಯಾಗಿಯೂ ಶರಣ ವಿಚಾರವಾಹಿನಿಯ ಮೂಲಕ ಶರಣರ ಚಿಂತನೆಗಳನ್ನು ಜನರಿಗೆ ತಲುಪಿಸಲು ಅಪಾರ ಶ್ರಮ ವಹಿಸಿದ್ದಾರೆ.

ಕಳೆದ ನಾಲ್ಕು ದಶಕಗಳಿಂದ ಶರಣ ಸಾಹಿತ್ಯದ ಕುರಿತು ಯುವ ಪುನಶ್ಚೇತನ ಶಿಬಿರಗಳನ್ನು ಆಯೋಜಿಸುವುದರ ಜೊತೆಗೆ ನಾಡಿನ ಹಲವು ಊರುಗಳಲ್ಲಿ ಬಸವ ಭೂಮಿ ಯಾತ್ರೆಗಳನ್ನು ನಡೆಸಿದ್ದಾರೆ. ಶರಣ ಸಾಹಿತ್ಯಕ್ಕೆ ಸಂಬಂಧಿಸಿದ ಹಲವು ಕೃತಿಗಳನ್ನು ಪ್ರಕಟಿಸಿರುವ ಅವರು, ವಿಶೇಷವಾಗಿ ವ್ಯಸನಮುಕ್ತಿ ಶಿಬಿರಗಳನ್ನು ಆಯೋಜಿಸುವಲ್ಲಿಯೂ ಮುಂಚೂಣಿಯಲ್ಲಿದ್ದಾರೆ.

ಚಂದ್ರಶೇಖರ ಸೋಮಶೆಟ್ಟಿಗೆ ಗೌರವ

ಬೀದರ್‌ನ ಚಂದ್ರಶೇಖರ ಸೋಮಶೆಟ್ಟಿ ಅವರು ಅಸಾಧಾರಣ ಕಲಾ ಪ್ರತಿಭೆ ಹೊಂದಿದ್ದು, ಕಲೆಯೇ ಜೀವನದ ಬೆಳಕು ಎಂದು ನಂಬಿದವರು. ಮೂಲತಃ ಜಹೀರಾಬಾದ್‌ನವರಾದ ಅವರು, ನಾಡೋಜ ಡಾ. ಜೆ.ಎಸ್. ಖಂಡೇರಾವ್ ಅವರಂತಹ ಅಪರೂಪದ ಕಲಾಗುರುಗಳ ಬಳಿ ಚಿತ್ರಕಲೆ ಶಿಕ್ಷಣ ಪಡೆದು ಜಲವರ್ಣ ಚಿತ್ರಕಲೆಯಲ್ಲಿ ಗಮನಾರ್ಹ ಸಾಧನೆ ಮಾಡಿದ್ದಾರೆ.

ಮೂರೂವರೆ ದಶಕಗಳ ಕಾಲ ಬೀದರ್‌ನಲ್ಲಿ ಕಲಾ ಶಿಕ್ಷಕರಾಗಿ ಸೇವೆ ಸಲ್ಲಿಸಿದ ಅವರು, ನಿವೃತ್ತಿ ಜೀವನದಲ್ಲಿ ದೊರೆತ ಸಂಪನ್ಮೂಲಗಳನ್ನು ಶ್ರೀ ಮಹಾತ್ಮ ಬಸವಣ್ಣನವರು ಹಾಗೂ ಇತರ ಶರಣರ ಕಲ್ಯಾಣಕ್ರಾಂತಿಯ ವಿವಿಧ ಸನ್ನಿವೇಶಗಳನ್ನು ಚಿತ್ರಿಸಲು ವಿನಿಯೋಗಿಸಿದ್ದಾರೆ. ಬೀದರ್ ನಗರದಲ್ಲಿ ಆಕರ್ಷಕ ಬಸವೇಶ್ವರ ಕಲಾ ಗ್ಯಾಲರಿಯನ್ನು ನಿರ್ಮಿಸಿರುವುದು ಅವರ ಪ್ರಮುಖ ಸಾಧನೆಗಳಲ್ಲಿ ಒಂದಾಗಿದೆ.

ಬಸವ ತತ್ವಗಳ ಪ್ರಸಾರ, ಸಾಮಾಜಿಕ ಸಮಾನತೆ ಮತ್ತು ಶರಣರ ವಿಚಾರಧಾರೆಗಳನ್ನು ಜನಸಾಮಾನ್ಯರಿಗೆ ತಲುಪಿಸಲು ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸಿರುವ ಗಣ್ಯರಿಗೆ ಈ ಪ್ರಶಸ್ತಿಗಳನ್ನು ಘೋಷಿಸಲಾಗಿದೆ.