ಕಲಬುರಗಿಯಲ್ಲಿ ಮೀಲಾದುನ್ನಬಿ ನಿಮಿತ್ತ ಧಾರ್ಮಿಕ ಸಮಾವೇಶ

ಕಲಬುರಗಿ, ಆ.26: ನಗರದ ಗ್ಯಾರಹ್ ಸಿಡಿಯಲ್ಲಿ ಮಂಗಳವಾರ ಈಶಾ ನಮಾಜ್ ಬಳಿಕ ಮಜ್ಲಿಸ್-ಎ-ಮುಹಬ್ಬಿನ್ ಹಾಗೂ ಮುಸ್ತಫಾ ಸಲ್ಲಲ್ಲಾಹು ಅಲೈಹಿ ವಸಲ್ಲಂ ಮತ್ತು ಅಹ್ಲೆ ಸುನ್ನತ್ ವಲ್ ಜಮಾತ್ ಶರೀಫ್ ವತಿಯಿಂದ ಮೀಲಾದುನ್ನಬಿ ನಿಮಿತ್ತ ಧಾರ್ಮಿಕ ಸಮಾವೇಶ ನಡೆಯಿತು. ಹಜರತ್ ಖ್ವಾಜಾ ಬಂದೇನವಾಜ್ ದರ್ಗಾದ ಸಜ್ಜಾದಾ ನಶೀನ್ ಹಜರತ್ ಡಾ. ಹಾಫಿಜ್ ಸೈಯದ್ ಮುಹಮ್ಮದ್ ಅಲಿ ಅಲ್ ಹುಸೇನಿ ಕಿಬ್ಲಾ ಅವರು ಸಮಾವೇಶದ ಅಧ್ಯಕ್ಷತೆ ವಹಿಸಿದ್ದರು.

ಉಸ್ಮಾನಿಯಾ ವಿಶ್ವವಿದ್ಯಾಲಯದ ಅರೇಬಿಕ್ ವಿಭಾಗದ ಮಾಜಿ ಮುಖ್ಯಸ್ಥ ಹಾಗೂ ನಿರ್ದೇಶಕ ಪ್ರವಾದಿ ಮುಹಮ್ಮದ್ ಸಲ್ಲಲ್ಲಾಹು ಅಲೈಹಿ ವಸಲ್ಲಂ ಅವರ ಪವಿತ್ರ ಜೀವನ ಮತ್ತು ಬೋಧನೆಗಳ ಕುರಿತು ಜ್ಞಾನಪೂರ್ಣ ಉಪನ್ಯಾಸ ನೀಡಿದರು. ಇದೇ ಸಂದರ್ಭದಲ್ಲಿ ನಗರದ ಶರೀಫ್ ಸಂಗತರಾಶ್ ವಾಡಿ ಮಸೀದಿಯ ಖತೀಬ್ ಹಾಗೂ ಇಮಾಮ್ ಮೌಲಾನಾ ಹಾಫಿಜ್ ಸೈಯದ್ ಖಾಸಿಂ ಬುಖಾರಿ ಅವರು ಸೀರತುನ್ನಬಿ ಕುರಿತು ಮಾತನಾಡಿ, ಪ್ರವಾದಿ ಮುಹಮ್ಮದ್ ಸಲ್ಲಲ್ಲಾಹು ಅಲೈಹಿ ವಸಲ್ಲಂ ಅವರ ಜೀವನ ಹಾಗೂ ಗುಣಚರಿತ್ರೆಯ ವಿವಿಧ ಆಯಾಮಗಳನ್ನು ವಿವರಿಸಿದರು.

ಕಾರ್ಯಕ್ರಮದಲ್ಲಿ ಡಾ. ಸೈಯದ್ ಮುಸ್ತಫಾ ಅಲ್ ಹುಸೇನಿ, ಸೈಯದ್ ವಲಿ ಹುಸೇನಿ, ಮೌಲಾನಾ ಸೈಯದ್ ಅಬ್ದುಲ್ ರಶೀದ್, ದರ್ಗಾ ಶರೀಫ್ ಮಸೀದಿಯ ಮೌಲಾನಾ ಮುಫ್ತಿ ಸೇರಿದಂತೆ ಹಲವು ಧಾರ್ಮಿಕ ವಿದ್ವಾಂಸರು ಹಾಗೂ ಗಣ್ಯರು ಉಪಸ್ಥಿತರಿದ್ದರು. ಅಪಾರ ಸಂಖ್ಯೆಯಲ್ಲಿ ಭಕ್ತರು ಸಮಾವೇಶದಲ್ಲಿ ಭಾಗವಹಿಸಿ ಕಾರ್ಯಕ್ರಮದ ಯಶಸ್ಸಿಗೆ ಸಾಕ್ಷಿಯಾದರು.