ದರೋಡೆಗೆ ಸಂಚು: ಇಬ್ಬರ ಬಂಧನ, ಮೂವರು ಆರೋಪಿಗಳ ಪರಾರಿ

ಕಲಬುರಗಿ, ಅ. 29: ದರೋಡೆಗೆ ಸಂಚು ರೂಪಿಸಿದ್ದ ಆರೋಪದ ಮೇಲೆ ಇಬ್ಬರನ್ನು ಪೊಲೀಸರು ಬಂಧಿಸಿದ್ದು, ಉಳಿದ ಮೂವರು ಆರೋಪಿಗಳು ಪೊಲೀಸರತ್ತ ಗುಂಡು ಹಾರಿಸಿ ಪರಾರಿಯಾಗಿರುವ ಘಟನೆ ಜಿಲ್ಲೆಯ ಆಳಂದ ತಾಲೂಕಿನ ತಡೋಳಾ ಗ್ರಾಮದ ಗಡಿಭಾಗದ ಜಮೀನು ಪ್ರದೇಶದಲ್ಲಿ ನಡೆದಿದೆ.

ದರೋಡೆ ನಡೆಸಲು ಸಜ್ಜಾಗಿದ್ದ ಶಸ್ತ್ರಸಜ್ಜಿತ ತಂಡವೊಂದು ಹಾಡಹಗಲೇ ಸಾರ್ವಜನಿಕರು ಹಾಗೂ ವಾಹನ ಸವಾರರನ್ನು ಬೆದರಿಸಿ ಸುಲಿಗೆ ಮಾಡಲು ಸಂಚು ರೂಪಿಸುತ್ತಿದೆ ಎಂಬ ಖಚಿತ ಮಾಹಿತಿಯ ಮೇರೆಗೆ ಪಿಎಸ್‌ಐ ಚಂದ್ರಕಾಂತ್ ನೇತೃತ್ವದ ಪೊಲೀಸ್ ತಂಡ ಸ್ಥಳಕ್ಕೆ ದಾಳಿ ನಡೆಸಿದೆ.

ಈ ಸಂದರ್ಭದಲ್ಲಿ ಸಂಜು ಎಂಬಾತ ತನ್ನ ಬಳಿಯಿದ್ದ ಪಿಸ್ತೂಲಿನಿಂದ ಎರಡು ಸುತ್ತು ಗುಂಡು ಹಾರಿಸಿ ಕಬ್ಬಿನ ಗದ್ದೆಯತ್ತ ಪರಾರಿಯಾಗಿದ್ದಾನೆ. ಆತನೊಂದಿಗೆ ಇತರ ಇಬ್ಬರು ಆರೋಪಿಗಳಾದ ಕಾರ್ತಿಕ್ ಕಲ್ಲಪ್ಪ ಟೋಕಳೆ ಮತ್ತು ದತ್ತು ವೆಂಕಟ ಜಮಾದಾರ್ ಕೂಡ ಪರಾರಿಯಾಗಿದ್ದಾರೆ ಎಂದು ಮೂಲ ವರದಿ ತಿಳಿಸಿದೆ.

ಘಟನೆಗೆ ಸಂಬಂಧಿಸಿದಂತೆ ದತ್ತಾತ್ರೇಯ ಮೂಲಗೆ ಮತ್ತು ಗಣೇಶ ಬಿರಾದಾರ್ ಎಂಬುವರನ್ನು ಪೊಲೀಸರು ಬಂಧಿಸಿದ್ದಾರೆ.

ಈ ಕುರಿತು ಆಳಂದ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪರಾರಿಯಾಗಿರುವ ಮೂವರು ಆರೋಪಿಗಳ ಪತ್ತೆಗಾಗಿ ಪೊಲೀಸರು ಶೋಧ ಕಾರ್ಯಾಚರಣೆ ಮುಂದುವರಿಸಿದ್ದಾರೆ.