ಸೇಡಂ, ನ. 9: ಹಳೆಯ ಪ್ರೇಮ ಸಂಬಂಧದ ಹಿನ್ನೆಲೆಯಲ್ಲಿ ಪತಿಯನ್ನೇ ಕೊಲೆ ಮಾಡಿದ ಆರೋಪದ ಮೇಲೆ ಪತ್ನಿ ಹಾಗೂ ಆಕೆಯ ಪ್ರಿಯಕರನನ್ನು ಪೊಲೀಸರು ಬಂಧಿಸಿರುವ ಘಟನೆ ತಾಲ್ಲೂಕಿನ ಮಳಖೇಡ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ.
ಮಳಖೇಡ ಗ್ರಾಮದ ಸಿದ್ದರಾಮ ಮತ್ತು ಅಂಬಿಕಾ ಪಾಟೀಲ ದಂಪತಿಯಾಗಿದ್ದು, ಸಿದ್ದರಾಮ ಆನ್‌ಲೈನ್ ಕೇಂದ್ರ ನಡೆಸುತ್ತಿದ್ದರು. ಅಂಬಿಕಾಳಿಗೆ ಶಾಲಾ ದಿನಗಳಿಂದಲೂ ಮಾರುತಿ ಎಂಬಾತನೊಂದಿಗೆ ಪ್ರೇಮ ಸಂಬಂಧವಿತ್ತು ಎನ್ನಲಾಗಿದೆ. ಹತ್ತನೇ ತರಗತಿಯಲ್ಲಿ ಓದುತ್ತಿದ್ದಾಗ ಆರಂಭವಾಗಿದ್ದ ಈ ಸಂಬಂಧಕ್ಕೆ ಮನೆಯವರ ವಿರೋಧ ವ್ಯಕ್ತವಾಗಿತ್ತು. ಬಳಿಕ ಅಂಬಿಕಾಳ ಮದುವೆಯನ್ನು ಸಿದ್ದರಾಮನೊಂದಿಗೆ ಮಾಡಲಾಗಿತ್ತು. ಮದುವೆಯಾಗಿ ಮಕ್ಕಳಾದ ನಂತರವೂ ಅಂಬಿಕಾ ಮತ್ತು ಮಾರುತಿ ನಡುವಿನ ಸಂಪರ್ಕ ಮುಂದುವರಿದಿತ್ತು ಎಂದು ಪೊಲೀಸ್ ತನಿಖೆಯಿಂದ ತಿಳಿದುಬಂದಿದೆ.
ಪೊಲೀಸರ ಪ್ರಾಥಮಿಕ ತನಿಖೆಯ ಪ್ರಕಾರ, ಅಂಬಿಕಾ ಪತಿಗೆ ನಿದ್ರೆ ಮಾತ್ರೆ ನೀಡಿ, ಮಾರುತಿಗೆ ಮನೆಗೆ ಬರುವ ಅವಕಾಶ ಮಾಡಿಕೊಡುತ್ತಿದ್ದಳು ಎನ್ನಲಾಗಿದೆ. ಘಟನೆಯ ರಾತ್ರಿ ಎಂದಿನಂತೆ ಸಿದ್ದರಾಮನಿಗೆ ನಿದ್ರೆ ಮಾತ್ರೆ ನೀಡಿದ್ದರೂ, ಅವರು ಅನಿರೀಕ್ಷಿತವಾಗಿ ಎಚ್ಚರಗೊಂಡಿದ್ದಾರೆ. ಈ ವೇಳೆ ಪತ್ನಿ ಮತ್ತು ಮಾರುತಿ ಒಟ್ಟಿಗೆ ಇರುವುದನ್ನು ಕಂಡಿದ್ದಾರೆ. ವಿಷಯ ಬಹಿರಂಗವಾಗುವ ಭೀತಿಯಿಂದ ಇಬ್ಬರೂ ಸೇರಿ ಸಿದ್ದರಾಮನನ್ನು ಕೊಲೆ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ.
ಕೊಲೆಯ ಬಳಿಕ ಅನುಮಾನ ಬಾರದಂತೆ ಅಂಬಿಕಾ ನಾಟಕವಾಡಿದ್ದಾಳೆ. ತನ್ನ ಪತಿ ಹಿಂದಿನ ರಾತ್ರಿ ಸ್ನೇಹಿತರೊಂದಿಗೆ ಪಾರ್ಟಿಗೆ ಹೋಗಿದ್ದರು. ಅಲ್ಲಿ ಯಾರೋ ಹಲ್ಲೆ ನಡೆಸಿ ಕೊಲೆ ಮಾಡಿದ್ದಾರೆ ಎಂದು ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದಳು ಎನ್ನಲಾಗಿದೆ.
ಆದರೆ ಪೊಲೀಸರ ವಿಚಾರಣೆ ವೇಳೆ ಅಂಬಿಕಾಳ ಹೇಳಿಕೆಗಳಲ್ಲಿ ವ್ಯತ್ಯಾಸ ಕಂಡುಬಂದಿದೆ. ವೃತ್ತಿಪರವಾಗಿ ತನಿಖೆ ನಡೆಸಿದ ಪೊಲೀಸರು ಹೆಚ್ಚಿನ ವಿಚಾರಣೆ ಕೈಗೊಂಡಾಗ, ಅಂಬಿಕಾ ಹಾಗೂ ಮಾರುತಿ ಸೇರಿ ಕೊಲೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ.
ಹಳೆಯ ಪ್ರೇಮ ಸಂಬಂಧದ ಹಿನ್ನೆಲೆಯಲ್ಲಿ ಪತಿಯ ಕೊಲೆ ನಡೆದಿರುವುದು ಗ್ರಾಮದಲ್ಲಿ ಆತಂಕ ಮೂಡಿಸಿದೆ. ಪ್ರಕರಣದ ಕುರಿತು ಪೊಲೀಸರು ಮುಂದಿನ ತನಿಖೆ ಮುಂದುವರಿಸಿದ್ದಾರೆ.
