ಸೆ.24ರಿಂದ 26ರವರೆಗೆ ಪಂಡಿತರಿಂದ ವಿಶೇಷ ಪ್ರವಚನ; ಸೆ.27ರಿಂದ ಅ.10ರವರೆಗೆ ಪಿತೃಕಾರ್ಯಗಳಿಗೆ ವ್ಯವಸ್ಥೆ
ಕಲಬುರಗಿ, ಸೆ.23: ನಗರದ ಕರುಣೇಶ್ವರ ನಗರದ ಶ್ರೀ ಜೈ ವೀರ ಹನುಮಾನ್ ದೇವಸ್ಥಾನ ಅಭಿವೃದ್ಧಿ ಸಂಘದ ವತಿಯಿಂದ ಪಿತೃಪಕ್ಷ-ಮಹಾಲಯದ ಅಂಗವಾಗಿ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದ್ದು, ಪಿತೃಕಾರ್ಯ ನೆರವೇರಿಸಲು ವಿಶೇಷ ವ್ಯವಸ್ಥೆ ಮಾಡಲಾಗಿದೆ ಎಂದು ಅವಿನಾಶ್ ಕುಲಕರ್ಣಿ, ವಿಶ್ವಾಸ ಮೋಘೇಕರ ಹಾಗೂ ವಿನುತಾ ಜೋಶಿ ತಿಳಿಸಿದ್ದಾರೆ.
ಪಿತೃಪಕ್ಷದ ಮಹತ್ವ, ಪಿತೃಕಾರ್ಯಗಳ ಆಚರಣೆ ಹಾಗೂ ಧಾರ್ಮಿಕ ವಿಧಿವಿಧಾನಗಳ ಕುರಿತು ಸೆ.24, 25 ಮತ್ತು 26ರಂದು ಪ್ರತಿದಿನ ಸಂಜೆ 6 ಗಂಟೆಗೆ ಪಂಡಿತ್ ಶ್ರೀ ಗೋಪಾಲಾಚಾರ್ಯ ಆಕಮಂಚಿ ಅವರಿಂದ ವಿಶೇಷ ಪ್ರವಚನ ಏರ್ಪಡಿಸಲಾಗಿದೆ. ಪ್ರವಚನದ ಬಳಿಕ ಭಕ್ತರ ಸಂದೇಹಗಳು ಹಾಗೂ ಪ್ರಶ್ನೆಗಳಿಗೆ ಪಂಡಿತರು ಉತ್ತರಿಸುವ ಮೂಲಕ ಸೂಕ್ತ ಧಾರ್ಮಿಕ ಮಾರ್ಗದರ್ಶನ ನೀಡಲಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.
ಸೆ.27ರಿಂದ ಅ.10ರವರೆಗೆ 14 ದಿನಗಳ ಕಾಲ ನಡೆಯಲಿರುವ ಪಿತೃಪಕ್ಷದಲ್ಲಿ ಭಕ್ತರು ಪಿಂಡಪ್ರದಾನ, ಶ್ರಾದ್ಧ ಸೇರಿದಂತೆ ವಿವಿಧ ಪಿತೃಕಾರ್ಯಗಳನ್ನು ನೆರವೇರಿಸಲು ಅವಕಾಶ ಕಲ್ಪಿಸಲಾಗಿದೆ. ಪಿತೃಕಾರ್ಯಗಳಿಗೆ ಅಗತ್ಯ ಮಾರ್ಗದರ್ಶನ ಹಾಗೂ ವ್ಯವಸ್ಥೆಯನ್ನು ದೇವಸ್ಥಾನದ ವತಿಯಿಂದ ಮಾಡಲಾಗುವುದು.
ಪಿತೃಕಾರ್ಯ ನೆರವೇರಿಸಲು ಇಚ್ಛಿಸುವವರು ಮುಂಚಿತವಾಗಿ ದೇವಸ್ಥಾನದ ವ್ಯವಸ್ಥಾಪಕರನ್ನು ಸಂಪರ್ಕಿಸಿ ನೋಂದಣಿ ಮಾಡಿಕೊಳ್ಳಬೇಕು. ಅಗತ್ಯ ಸಾಮಗ್ರಿಗಳೊಂದಿಗೆ ನಿಗದಿತ ಸಮಯಕ್ಕೆ ಆಗಮಿಸಬೇಕು ಎಂದು ಸಂಘದ ಪದಾಧಿಕಾರಿಗಳು ತಿಳಿಸಿದ್ದಾರೆ.
ಪಿತೃಪಕ್ಷದ ಪವಿತ್ರ ಅವಧಿಯಲ್ಲಿ ಭಕ್ತರು ತಮ್ಮ ಪೂರ್ವಜರನ್ನು ಶ್ರದ್ಧಾಭಕ್ತಿಯಿಂದ ಸ್ಮರಿಸಿ ಪಿತೃಕಾರ್ಯಗಳನ್ನು ನೆರವೇರಿಸುವ ಮೂಲಕ ಧಾರ್ಮಿಕ ಕಾರ್ಯಕ್ರಮದ ಸದುಪಯೋಗ ಪಡೆದುಕೊಳ್ಳಬೇಕು ಎಂದು ಅವರು ಮನವಿ ಮಾಡಿದ್ದಾರೆ.
