20 ಸಾವಿರ ಅಡಿ ಎತ್ತರದಲ್ಲಿ ಭೀಕರ ಅವಘಡ: ವಿಮಾನದ ಕಿಟಕಿ ಒಡೆದು ಪ್ರಯಾಣಿಕ ಹೊರಕ್ಕೆ ಎಳೆಯಲ್ಪಟ್ಟ ಕ್ಷಣ
ರಯಾನೇರ್ ವಿಮಾನದ ಎಂಜಿನ್ ದೋಷದಿಂದ ಗಗನದಲ್ಲೇ ಆತಂಕ; ಸೀಟ್ಬೆಲ್ಟ್ ಧರಿಸಿದ್ದರಿಂದ 61 ವರ್ಷದ ಪ್ರಯಾಣಿಕನ ಜೀವ ಉಳಿಯಿತು
ಅಥೆನ್ಸ್/ಬರ್ಲಿನ್: ಗ್ರೀಸ್ನಿಂದ ಜರ್ಮನಿಗೆ ತೆರಳುತ್ತಿದ್ದ ರಯಾನೇರ್ ವಿಮಾನದಲ್ಲಿ ಗಗನದಲ್ಲೇ ಭಯಾನಕ ಘಟನೆ ಸಂಭವಿಸಿದ್ದು, 20 ಸಾವಿರ ಅಡಿ ಎತ್ತರದಲ್ಲಿ ವಿಮಾನದ ಕಿಟಕಿ ಒಡೆದ ಪರಿಣಾಮ 61 ವರ್ಷದ ಪ್ರಯಾಣಿಕನೊಬ್ಬ ಭಾಗಶಃ ವಿಮಾನದ ಹೊರಭಾಗಕ್ಕೆ ಎಳೆಯಲ್ಪಟ್ಟಿದ್ದಾನೆ. ಅದೃಷ್ಟವಶಾತ್ ಸೀಟ್ಬೆಲ್ಟ್ ಧರಿಸಿದ್ದರಿಂದ ಹಾಗೂ ಪತ್ನಿ ಸಮಯಪ್ರಜ್ಞೆ ತೋರಿದ್ದರಿಂದ ಆತನ ಜೀವ ಉಳಿದಿದೆ.
ವರದಿಗಳ ಪ್ರಕಾರ, ಶುಕ್ರವಾರ ಗ್ರೀಸ್ನಿಂದ ಜರ್ಮನಿಗೆ ಹೊರಟಿದ್ದ ಬೋಯಿಂಗ್ 737 ವಿಮಾನ ಟೇಕ್ಆಫ್ ಆದ ಸುಮಾರು ಆರು ನಿಮಿಷಗಳ ನಂತರ 15 ಸಾವಿರ ಅಡಿ ಎತ್ತರ ತಲುಪುತ್ತಿದ್ದ ವೇಳೆ ಭಾರೀ ಸ್ಫೋಟದಂತಹ ಶಬ್ದ ಕೇಳಿಬಂದಿತು. ಎಂಜಿನ್ನ ಒಂದು ಬ್ಲೇಡ್ ತುಂಡಾಗಿ ವಿಮಾನದ ಕಿಟಕಿಗೆ ಅಪ್ಪಳಿಸಿದ ಪರಿಣಾಮ ಕಿಟಕಿ ಸಂಪೂರ್ಣ ಒಡೆದು, ಕ್ಯಾಬಿನ್ನಲ್ಲಿ ತೀವ್ರ ವಾಯು ಒತ್ತಡ ಕುಸಿತ ಉಂಟಾಯಿತು.
ತಕ್ಷಣವೇ ಆಮ್ಲಜನಕ ಮಾಸ್ಕ್ಗಳು ಕೆಳಕ್ಕೆ ಬಿದ್ದವು ಮತ್ತು ವಿಮಾನದೊಳಗೆ ಆತಂಕದ ವಾತಾವರಣ ನಿರ್ಮಾಣವಾಯಿತು.
ಕಿಟಕಿಯ ಪಕ್ಕದ ಆಸನದಲ್ಲಿ ಕುಳಿತಿದ್ದ 61 ವರ್ಷದ ಸರ್ಬಿಯಾ ಮೂಲದ ಪ್ರಯಾಣಿಕನ ತಲೆ ಮತ್ತು ಭುಜಗಳು ವಿಮಾನದ ಹೊರಭಾಗಕ್ಕೆ ಎಳೆಯಲ್ಪಟ್ಟವು. ಆದರೆ ಅವರು ಸೀಟ್ಬೆಲ್ಟ್ ಧರಿಸಿದ್ದರಿಂದ ಸಂಪೂರ್ಣ ಹೊರಕ್ಕೆ ಎಸೆಯಲ್ಪಡುವ ಅಪಾಯ ತಪ್ಪಿತು.
ಪ್ರಯಾಣಿಕನ ಪತ್ನಿ ಸುಮಾರು ಐದು ನಿಮಿಷಗಳ ಕಾಲ ಅವರ ಕಾಲುಗಳನ್ನು ಬಿಗಿಯಾಗಿ ಹಿಡಿದುಕೊಂಡು ಜೀವ ಉಳಿಸಲು ಹರಸಾಹಸಪಟ್ಟರು. ಬಳಿಕ ಇತರ ಪ್ರಯಾಣಿಕರೂ ಸಹಾಯಕ್ಕೆ ಧಾವಿಸಿ ಅವರನ್ನು ಸುರಕ್ಷಿತವಾಗಿ ವಿಮಾನದೊಳಗೆ ಎಳೆದು ತಂದರು.
ಘಟನೆಯ ಬಳಿಕ ಹೊರಬಿದ್ದ ಹೊಸ ವಿಡಿಯೋದಲ್ಲಿ ವಿಮಾನದ ಎಂಜಿನ್ನ ರಕ್ಷಣಾತ್ಮಕ ಭಾಗ (ನಸೆಲ್) ತೀವ್ರವಾಗಿ ಹಾನಿಗೊಳಗಾಗಿರುವುದು ಹಾಗೂ ಎಂಜಿನ್ ಬ್ಲೇಡ್ನ ಒಂದು ಭಾಗ ಕಾಣೆಯಾಗಿರುವುದು ಗೋಚರಿಸಿದೆ. ಅದೇ ವಿಡಿಯೋದಲ್ಲಿ ಕಿಟಕಿ ಸಂಪೂರ್ಣ ಒಡೆದಿರುವ ದೃಶ್ಯವೂ ದಾಖಲಾಗಿದೆ.
ಘಟನೆಯ ಕುರಿತು ಸಂಬಂಧಿತ ವಿಮಾನಯಾನ ಅಧಿಕಾರಿಗಳು ತನಿಖೆ ಆರಂಭಿಸಿದ್ದು, ಎಂಜಿನ್ ದೋಷ ಮತ್ತು ಸುರಕ್ಷತಾ ಕ್ರಮಗಳ ಕುರಿತು ಪರಿಶೀಲನೆ ನಡೆಸಲಾಗುತ್ತಿದೆ. ಪ್ರಯಾಣಿಕರ ಸಮಯಪ್ರಜ್ಞೆ ಮತ್ತು ಸೀಟ್ಬೆಲ್ಟ್ ಬಳಕೆಯಿಂದ ಸಂಭವಿಸಬಹುದಾಗಿದ್ದ ದೊಡ್ಡ ದುರಂತ ತಪ್ಪಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
