‘ಧನುಷ್‌ಗೆ ಸಿನಿಮಾ ಇಷ್ಟವೇ ಇರಲಿಲ್ಲ’: ಪುತ್ರನ ಕುರಿತು ಕಸ್ತೂರಿ ರಾಜಾ ಬಹಿರಂಗ ಹೇಳಿಕೆ

ತಮಿಳು ಚಿತ್ರರಂಗದ ಖ್ಯಾತ ನಿರ್ದೇಶಕ ಹಾಗೂ ನಟ ಧನುಷ್ ಅವರ ತಂದೆ ಕಸ್ತೂರಿ ರಾಜಾ, ಧನುಷ್ ಅವರ ಸಿನಿಮಾ ಪ್ರವೇಶದ ಕುರಿತು ಅಚ್ಚರಿಯ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ. ತಮ್ಮ ಮೊಮ್ಮಗ ಪವೀಶ್ ಅಭಿನಯದ ‘ಲವ್ ಓ ಲವ್’ ಚಿತ್ರದ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಧನುಷ್ ಸ್ವಯಂ ಇಚ್ಛೆಯಿಂದ ಚಿತ್ರರಂಗಕ್ಕೆ ಬಂದವರಲ್ಲ ಎಂದು ಹೇಳಿದರು.

“ನಮ್ಮ ಕುಟುಂಬದಲ್ಲಿರುವ ಮೂವರು ನಿರ್ದೇಶಕರಲ್ಲಿ ಸೆಲ್ವರಾಘವನ್ ಮಾತ್ರ ಸಿನಿಮಾ ಕ್ಷೇತ್ರಕ್ಕೆ ಬರಲು ಆಸಕ್ತಿ ತೋರಿದ್ದರು. ಧನುಷ್‌ಗೆ ಸಿನಿಮಾ ಎಂದರೆ ಇಷ್ಟವೇ ಇರಲಿಲ್ಲ. ಐದಾರು ಸಿನಿಮಾಗಳವರೆಗೆ ಅವರು ಚಿತ್ರರಂಗವನ್ನು ಬಿಡಲು ನನ್ನನ್ನು ಕೇಳುತ್ತಿದ್ದರು. ‘ತುಳ್ಳುವಧೋ ಇಲಮೈ’ ಚಿತ್ರದ ಚಿತ್ರೀಕರಣದ ವೇಳೆ ಪ್ರತಿ ದೃಶ್ಯಕ್ಕೂ ಮುನ್ನ ‘ಅಪ್ಪಾ, ನನ್ನನ್ನು ಬಿಡಿ’ ಎಂದು ಹೇಳುತ್ತಾ ಅಳುತ್ತಿದ್ದರು” ಎಂದು ಕಸ್ತೂರಿ ರಾಜಾ ನೆನಪಿಸಿಕೊಂಡರು.

ಇನ್ನು ಧನುಷ್ ಅವರ ಅಣ್ಣ, ನಿರ್ದೇಶಕ ಸೆಲ್ವರಾಘವನ್ ಬಗ್ಗೆ ಮಾತನಾಡಿದ ಅವರು, “ಅವರು ನಮ್ಮ ಕುಟುಂಬದಲ್ಲೇ ಅತ್ಯಂತ ಹೆಚ್ಚು ವಿದ್ಯಾವಂತರಾಗಿದ್ದು, ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಪದವೀಧರರು. ನನ್ನ ಮಕ್ಕಳನ್ನು ಸಿನಿಮಾ ಕ್ಷೇತ್ರಕ್ಕೆ ತರಬಾರದು ಎಂಬುದು ನನ್ನ ನಿರ್ಧಾರವಾಗಿತ್ತು. ಆದ್ದರಿಂದ ಅವರನ್ನು ಚಿತ್ರಗಳ ಪ್ರೀಮಿಯರ್ ಪ್ರದರ್ಶನಕ್ಕೂ ಕರೆದುಕೊಂಡು ಹೋಗುತ್ತಿರಲಿಲ್ಲ” ಎಂದು ಹೇಳಿದರು.

ಆದರೆ, ಕಾಲೇಜಿನ ಎರಡನೇ ವರ್ಷದ ವೇಳೆ ಸೆಲ್ವರಾಘವನ್ ಸಿನಿಮಾ ಕ್ಷೇತ್ರಕ್ಕೆ ಬರಬೇಕೆಂದು ಬಯಸಿದಾಗ, ಮೊದಲು ಪದವಿ ಪೂರ್ಣಗೊಳಿಸುವಂತೆ ತಾವು ಮನವೊಲಿಸಿದ್ದಾಗಿ ಕಸ್ತೂರಿ ರಾಜಾ ತಿಳಿಸಿದರು. ಪದವಿ ಪಡೆದ ಬಳಿಕವೇ ಚಿತ್ರರಂಗಕ್ಕೆ ಪ್ರವೇಶಿಸಲು ಅವಕಾಶ ನೀಡಿದ್ದಾಗಿ ಹೇಳಿದರು.

ಅದೇ ವೇಳೆ ‘ಲವ್ ಓ ಲವ್’ ಚಿತ್ರದ ನಿರ್ಮಾಪಕರು, ನಿರ್ದೇಶಕರು ಹಾಗೂ ಕಲಾವಿದರ ತಂಡದ ಶ್ರಮವನ್ನು ಕಸ್ತೂರಿ ರಾಜಾ ಶ್ಲಾಘಿಸಿದರು. ನಿರ್ಮಾಪಕರು ಮತ್ತು ನಿರ್ದೇಶಕರ ನಡುವಿನ ಪರಸ್ಪರ ವಿಶ್ವಾಸವೇ ಉತ್ತಮ ಸಿನಿಮಾದ ಯಶಸ್ಸಿನ ಬಲ ಎಂದು ಹೇಳಿದ ಅವರು, ನಾಯಕ ಪವೀಶ್ ಹಾಗೂ ನಾಯಕಿ ನಾಗದುರ್ಗಾ ಅವರ ಅಭಿನಯವನ್ನು ಮೆಚ್ಚುಗೆ ವ್ಯಕ್ತಪಡಿಸಿದರು.