ಜಾನಪದ ಲೋಕದ ದಿಗ್ಗಜರ ಕೃತಿ ಬಿಡುಗಡೆ: ಕೃಷಿ ಕಾಯಕದ ಜೊತೆಗೆ ಸಾಹಿತ್ಯ ಸೃಷ್ಟಿಸಿದ ಜನಪದರ ಕೊಡುಗೆ ಅನನ್ಯ

ಕಲಬುರಗಿ, ಆ.2: ಮನುಷ್ಯನ ಜನ್ಮದೊಂದಿಗೆ ಜಾನಪದವೂ ಹುಟ್ಟಿದ್ದು, ನಶಿಸುತ್ತಿರುವ ಜಾನಪದ ಲೋಕವನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವ ಹಾಗೂ ಸಂರಕ್ಷಿಸುವ ಕಾರ್ಯ ಅತ್ಯಂತ ಶ್ಲಾಘನೀಯ ಎಂದು ಶಾಸಕ ಅಲ್ಲಮಪ್ರಭು ಪಾಟೀಲ ಹೇಳಿದರು.

ಕರ್ನಾಟಕ ಜಾನಪದ ಪರಿಷತ್ತು ಜಿಲ್ಲಾ ಘಟಕ ಹಾಗೂ ಗೋದುತಾಯಿ ಮಹಿಳಾ ಶಿಕ್ಷಣ ಮಹಾವಿದ್ಯಾಲಯದ ಸಹಯೋಗದಲ್ಲಿ ನಗರದ ಗೋದುತಾಯಿ ಕಾಲೇಜಿನ ಸಭಾಂಗಣದಲ್ಲಿ ಭಾನುವಾರ ಆಯೋಜಿಸಿದ್ದ ‘ಜಾನಪದ ಲೋಕದ ದಿಗ್ಗಜರು’ ಸಂಪಾದನಾ ಕೃತಿ ಲೋಕಾರ್ಪಣೆ ಸಮಾರಂಭವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಜಾನಪದವೇ ನಾಗರಿಕತೆಯ ತೊಟ್ಟಿಲು. ಜಾನಪದ ಸಾಹಿತ್ಯ ಮನುಷ್ಯನ ಬದುಕಿಗೆ ಶಾಂತಿ, ನೆಮ್ಮದಿ ಮತ್ತು ಸಂಸ್ಕಾರದ ಮೌಲ್ಯಗಳನ್ನು ನೀಡುತ್ತದೆ. ಆಧುನಿಕತೆಯ ನಡುವೆಯೂ ಜಾನಪದ ಪರಂಪರೆಯನ್ನು ಉಳಿಸಿ ಬೆಳೆಸುವ ಅಗತ್ಯವಿದೆ ಎಂದು ಅವರು ತಿಳಿಸಿದರು.

ಕರ್ನಾಟಕ ಜಾನಪದ ಅಕಾಡೆಮಿ ಸದಸ್ಯ ಡಾ. ಎಂ.ಎಂ. ಪಡಶೆಟ್ಟಿ ಕೃತಿಯನ್ನು ಲೋಕಾರ್ಪಣೆ ಮಾಡಿ ಮಾತನಾಡಿ, ರಾಜ್ಯದ ಶ್ರೇಷ್ಠ ಜಾನಪದ ವಿದ್ವಾಂಸರ ಬದುಕು ಮತ್ತು ಬರಹಗಳನ್ನು ಒಂದೇ ಕೃತಿಯಲ್ಲಿ ಸಂಗ್ರಹಿಸಿರುವ ಸಂಪಾದಕ ಸಿ.ಎಸ್. ಮಾಲಿಪಾಟೀಲ ಅವರ ಕಾರ್ಯ ಸರ್ಕಾರ ಮತ್ತು ಅಕಾಡೆಮಿ ಮಾಡಬೇಕಿದ್ದ ಮಹತ್ವದ ಕೆಲಸವಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ಬ್ರಿಟಿಷರ ಕಾಲಘಟ್ಟದಲ್ಲಿಯೂ ಕನ್ನಡ ಜಾನಪದ ಸಂಸ್ಕೃತಿಯ ಕುರಿತು ಮಹತ್ವದ ಅಧ್ಯಯನಗಳು ನಡೆದಿವೆ. ಕೃಷಿ ಕಾಯಕದೊಂದಿಗೆ ಸಾಹಿತ್ಯ ಸೃಷ್ಟಿಸಿದ ಜನಪದರು ನಮ್ಮ ಸಂಸ್ಕೃತಿಯ ನಿಜವಾದ ಧ್ವನಿಯಾಗಿದ್ದಾರೆ. ಮಾತನಾಡುವ ಜನರಿರುವವರೆಗೆ ಜಾನಪದ ಜೀವಂತವಾಗಿಯೇ ಉಳಿಯುತ್ತದೆ. ವಿಶೇಷವಾಗಿ ಮಹಿಳೆಯರು ಜನಪದ ಸಾಹಿತ್ಯದ ಪ್ರಮುಖ ವಾಹಕರಾಗಿದ್ದು, ಅವರ ಹಾಡುಗಳಲ್ಲಿ ಬದುಕಿನ ಅನುಭವಗಳು ಅಡಗಿವೆ ಎಂದು ಹೇಳಿದರು.

ಸಾಹಿತಿ ಮಹಿಪಾಲರೆಡ್ಡಿ ಮುನ್ನೂರ್ ಕೃತಿ ಪರಿಚಯಿಸಿ, ದೇವನುಡಿ, ದೇಶನುಡಿ ಹಾಗೂ ಆಂಗ್ಲ ಭಾಷೆಯ ಪ್ರಭಾವದ ನಡುವೆಯೂ ಜಾನಪದ ಸಾಹಿತ್ಯ ತನ್ನ ಜೀವಂತಿಕೆಯನ್ನು ಉಳಿಸಿಕೊಂಡಿದೆ ಎಂಬುದಕ್ಕೆ ಈ ಕೃತಿಯೇ ಸಾಕ್ಷಿಯಾಗಿದೆ ಎಂದರು. ಕಾರಂತ, ಸಿಂಪಿ ಲಿಂಗಣ್ಣ, ಕರೀಂಖಾನ್, ಡಾ. ಹ.ಮಾ. ನಾಯಕ ಸೇರಿದಂತೆ ಅನೇಕ ಜಾನಪದ ದಿಗ್ಗಜರ ಕುರಿತು 28 ಲೇಖಕರು ಬರೆದಿರುವ ಲೇಖನಗಳು ಈ ಕೃತಿಗೆ ವಿಶೇಷ ಮೌಲ್ಯವನ್ನು ತಂದಿವೆ ಎಂದು ತಿಳಿಸಿದರು.

ಅಧ್ಯಕ್ಷತೆ ವಹಿಸಿದ್ದ ಹಿರಿಯ ಸಾಹಿತಿ ಎ.ಕೆ. ರಾಮೇಶ್ವರ ಮಾತನಾಡಿ, ಸ್ವಾತಂತ್ರ್ಯ ಹೋರಾಟದಲ್ಲಿ ಜಾನಪದ ಕಲಾವಿದರ ಪಾತ್ರ ಅಪಾರವಾಗಿದೆ. ಲಾವಣಿ, ಗೀಗಿ ಹಾಗೂ ಇತರ ಜನಪದ ಕಲಾ ಪ್ರಕಾರಗಳ ಮೂಲಕ ಸ್ವಾತಂತ್ರ್ಯ ಮತ್ತು ಸ್ವಾಭಿಮಾನದ ಕಿಚ್ಚನ್ನು ಜನರಲ್ಲಿ ಹೊತ್ತಿಸಿದ ಮಹತ್ವದ ಕಾರ್ಯವನ್ನು ಅವರು ಮಾಡಿದ್ದಾರೆ ಎಂದು ಹೇಳಿದರು.

ಮುಖ್ಯ ಅತಿಥಿಗಳಾಗಿ ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ ರಾಜ್ಯ ಉಪಾಧ್ಯಕ್ಷ ಅಪ್ಪಾರಾವ ಅಕ್ಕೋಣಿ, ನಿವೃತ್ತ ಪ್ರಾಚಾರ್ಯೆ ಡಾ. ನೀಲಾಂಬಿಕಾ ಪೊಲೀಸ್ ಪಾಟೀಲ ಹಾಗೂ ಅಖಿಲ ಭಾರತ ಹೇಮರಡ್ಡಿ ಮಹಿಳಾ ಅಭಿವೃದ್ಧಿ ಸಂಘದ ರಾಜ್ಯಾಧ್ಯಕ್ಷೆ ವಿಶಾಲಕ್ಷಿ ವಿ. ಕರಡ್ಡಿ ಮಾತನಾಡಿದರು.

ಗೋದುತಾಯಿ ಮಹಿಳಾ ಬಿ.ಎಡ್. ಕಾಲೇಜಿನ ಪ್ರಾಚಾರ್ಯೆ ಡಾ. ಕಲ್ಪನಾ ಭೀಮಳ್ಳಿ ಸ್ವಾಗತಿಸಿದರು. ಬಸವರಾಜ ಬಡಿಗೇರ ಕಾರ್ಯಕ್ರಮ ನಿರೂಪಿಸಿದರು. ಸಿ.ಎಸ್. ಮಾಲಿಪಾಟೀಲ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಸುಂದರಾಬಾಯಿ ನಾಗಶೆಟ್ಟಿ ವಂದಿಸಿದರು.

ಕಾರ್ಯಕ್ರಮದಲ್ಲಿ ಶೋಭಾದೇವಿ ಚೆಕ್ಕಿ, ಭಾನುಕುಮಾರ ಗಿರೇಗೋಳ, ಡಿ.ಪಿ. ಸಜ್ಜನ್, ಉಮಾ ಸಿ. ಮಾಲಿಪಾಟೀಲ, ಹಣಮಂತರಾಯ ರಾಂಪುರೆ, ರಾಜಶೇಖರ ಸಿರಗೂರ, ಡಾ. ಸ್ವಾಮಿರಾವ ಕುಲಕರ್ಣಿ, ಡಾ. ಸೂರ್ಯಕಾಂತ ಪಾಟೀಲ, ಡಾ. ಶ್ರೀಶೈಲ ನಾಗರಾಳ, ಡಾ. ಶಿವರಂಜನ ಸತ್ಯಂಪೇಟೆ, ಸದಾನಂದ ಪಾಟೀಲ, ಭೀಮಣ್ಣ ಬೋನಾಳ, ಡಾ. ಕೆ.ಎಸ್. ಬಂಧು ಸೇರಿದಂತೆ ಹಲವರು ಉಪಸ್ಥಿತರಿದ್ದರು.

ಪ್ರಮುಖ ಮಾತು:
“ಜನಪದದಲ್ಲಿ ಬದುಕಿನ ಸೊಗಡಿದೆ. ಜನಪದ ಹಾಡುಗಳನ್ನು ಕೇವಲ ಸಂಗ್ರಹಿಸುವುದಷ್ಟೇ ಅಲ್ಲ, ಅವುಗಳ ಕುರಿತು ಸಂಶೋಧನಾತ್ಮಕ ಅಧ್ಯಯನ ನಡೆಸಬೇಕು. ವಿಜ್ಞಾನ ದೇಶಗಳನ್ನು ಹತ್ತಿರ ಮಾಡುತ್ತಿದ್ದರೂ, ಮನಸ್ಸುಗಳು ದೂರವಾಗುತ್ತಿರುವ ಈ ಕಾಲಘಟ್ಟದಲ್ಲಿ ಜಾನಪದ ಮೌಲ್ಯಗಳು ಮಾನವೀಯತೆಯನ್ನು ಬೆಳೆಸುತ್ತವೆ.” ಎಂದು ಕರ್ನಾಟಕ ಜಾನಪದ ಅಕಾಡೆಮಿ ಸದಸ್ಯ ಡಾ. ಎಂ.ಎಂ. ಪಡಶೆಟ್ಟಿ ಹೇಳಿದರು.