‘ಹಣೆಬರಹದಲ್ಲಿ ಜೀವನವಿಲ್ಲ, ಹಣೆ ಬೆವರಿನಲ್ಲಿ ಜೀವನವಿದೆ’ : ಉಜ್ಜಯಿನಿ ಜಗದ್ಗುರುಗಳ ಸಂದೇಶ

ಕಲಬುರಗಿ, ಆ.7: ಮನುಷ್ಯನ ಜೀವನವನ್ನು ಹಣೆಬರಹವಲ್ಲ, ಅವನ ಶ್ರಮ ಮತ್ತು ಬೆವರು ರೂಪಿಸುತ್ತದೆ. ಹಣೆಬರಹದಲ್ಲಿ ಜೀವನವಿಲ್ಲ, ಹಣೆ ಬೆವರಿನಲ್ಲಿ ಜೀವನವಿದೆ ಎಂಬ ಸತ್ಯವನ್ನು ಪ್ರತಿಯೊಬ್ಬರೂ ಅರಿತು ಬದುಕಬೇಕು ಎಂದು ಶ್ರೀಮದ್ ಉಜ್ಜಯಿನಿ ಜಗದ್ಗುರು ಸಿದ್ಧಲಿಂಗ ರಾಜದೇಶಿಕೇಂದ್ರ ಶಿವಾಚಾರ್ಯ ಭಗವತ್ಪಾದರು ಹೇಳಿದರು.

ನಗರದ ಸೊಗಸನಗೇರಿಯ ಶ್ರೀ ಗುರುಶಾಂತಲಿಂಗೇಶ್ವರ ಕಲ್ಯಾಣ ಮಂಟಪದಲ್ಲಿ ಆಯೋಜಿಸಿದ್ದ ಶ್ರೀ ಸಿದ್ಧಾಂತ ಶಿಖಾಮಣಿ ವಚನ ಸಾಹಿತ್ಯ ಸಮನ್ವಯಾತ್ಮಕ ಆಧ್ಯಾತ್ಮಿಕ ಧರ್ಮಸಭೆಯಲ್ಲಿ ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದ ಅವರು, ಪ್ರಯತ್ನಶೀಲ ವ್ಯಕ್ತಿಗೆ ಯಶಸ್ಸು ನಿಶ್ಚಿತ. ಮನುಷ್ಯನ ಬದುಕಿನಲ್ಲಿ ಎಷ್ಟೇ ಸಂಕಷ್ಟಗಳು ಎದುರಾದರೂ ಆತ್ಮವಿಶ್ವಾಸ ಕಳೆದುಕೊಳ್ಳದೆ ಶ್ರಮದಿಂದ ಮುಂದೆ ಸಾಗಿದರೆ ಯಶಸ್ಸು ಖಚಿತವಾಗಿಯೇ ದೊರೆಯುತ್ತದೆ ಎಂದು ತಿಳಿಸಿದರು.

ಮನುಷ್ಯನ ಬದುಕಿನಲ್ಲಿ ಕಾಯಕಕ್ಕೆ ಅತ್ಯಂತ ಮಹತ್ವವಿದೆ. ವೀರಶೈವ ಧರ್ಮದಲ್ಲಿ ಕಾಯಕವೇ ಕೈಲಾಸ ಎಂಬ ತತ್ವವನ್ನು ಜಗದ್ಗುರು ರೇಣುಕಾಚಾರ್ಯರು ಬೋಧಿಸಿದ್ದು, ಶರಣರು ಸಹ ದುಡಿಮೆ ಮತ್ತು ಶ್ರಮದ ಮಹತ್ವವನ್ನು ತಮ್ಮ ವಚನಗಳ ಮೂಲಕ ಸಾರಿದ್ದಾರೆ ಎಂದು ಹೇಳಿದರು.

ಧರ್ಮಸಭೆಯಲ್ಲಿ ಕಡಗಂಚಿಯ ವೀರಭದ್ರ ಶಿವಾಚಾರ್ಯರು ನೇತೃತ್ವ ವಹಿಸಿದ್ದರು. ರಾಯಚೂರಿನ ಅಭಿನವ ರಾಚೋಟೇಶ್ವರ ಶಿವಾಚಾರ್ಯರು, ಪಾಳಾದ ಡಾ. ಗುರುಮೂರ್ತಿ ಶಿವಾಚಾರ್ಯರು, ಚಂದನಕೇರಿಯ ರಾಚೋಟೇಶ್ವರ ಶಿವಾಚಾರ್ಯರು, ಕಡಗಂಚಿ-ಸುಲೇಪೇಟ ಮಠದ ಶ್ರೀಗಳು ಸೇರಿದಂತೆ ಅನೇಕ ಗಣ್ಯರು ಸಾನ್ನಿಧ್ಯ ವಹಿಸಿದ್ದರು.

ಚಂದ್ರಕಾಂತ ಭೂಸನೂರು, ಧುತ್ತರಗಾಂವದ ವೀರಣ್ಣ ಹೊನ್ನಶೆಟ್ಟಿ, ಕರಬಸಪ್ಪ ಕುಡಕಿ, ನಾಗಣ್ಣ ಮಾಡಗೊಂಡ, ಶಾಂತಪ್ಪ ಜವಳಿ, ಮಚೀಂದ್ರ ನರೋಣಿ, ಕಡಗಂಚಿ ಮಠದ ಕಾರ್ಯದರ್ಶಿ ಶಿವಾನಂದ ಮಠಪತಿ, ಕರಬಸಪ್ಪ ಅಮರಗೋಳ, ಜಗದ್ಗುರು ಪಂಚಾಚಾರ್ಯ ಮಾನವ ಧರ್ಮ ಸಂಸ್ಥೆಯ ಅಧ್ಯಕ್ಷ ಅಮೃತಪ್ಪ ಮಲಕಪ್ಪಗೌಡ, ಸೋಮಶೇಖರ ಮಠಪತಿ ಸೇರಿದಂತೆ ಹಲವರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಇದಕ್ಕೂ ಮುನ್ನ ಶ್ರೀಮದ್ ಉಜ್ಜಯಿನಿ ಜಗದ್ಗುರು ಮಹಾ ಸನ್ನಿಧಿಯವರ ಸಾರೋಟಿ ಉತ್ಸವ ನೆಹರು ಗಂಜ್ ಹನುಮಾನ್ ಮಂದಿರದಿಂದ ಆರಂಭವಾಗಿ ನೇತಾಜಿ ರಸ್ತೆ, ಚೌಕ್ ಮಾರ್ಗವಾಗಿ ಡೊಳ್ಳು ಕುಣಿತ, ಪುರವಂತರ, ಭಜನಾ ಮಂಡಳಿಗಳ ಹಾಗೂ ವೇದಘೋಷದೊಂದಿಗೆ ಭವ್ಯ ಮೆರವಣಿಗೆಯಾಗಿ ಶ್ರೀ ಗುರುಶಾಂತಲಿಂಗೇಶ್ವರ ಕಲ್ಯಾಣ ಮಂಟಪ ತಲುಪಿತು.

ಕಾರ್ಯಕ್ರಮದಲ್ಲಿ ಚೇತನ ಬೀದಿಮನಿ ಹಾಗೂ ಮಹಾಂತಯ್ಯ ನಿಂಗದಳ್ಳಿ ಅವರಿಂದ ಸಂಗೀತ ಕಾರ್ಯಕ್ರಮ ನಡೆಯಿತು. ಶಾಂತಕುಮಾರ ಮಡಿವಾಳ ಸ್ವಾಗತಿಸಿದರು. ಶಿವಯ್ಯ ಮಠಪತಿ ಕಾರ್ಯಕ್ರಮ ನಿರೂಪಿಸಿದರು.